Ջավախք հանրագիտարան

Ծնվել է 1948 թ. նոյեմբերի 22-ին Ախալցխայի շրջանի Ծղալթբիլա գյուղում: 1956 - 1966 թթ. սովորել է տեղի միջնակարգն դպրոցում, իսկ` 1970 - 1974 թթ. Երևանի Խ.Աբովյանի անվան հայկական պետական մանկավարժական համալսարանի գեղագիտության բաժնում:

1976 - 2000թթ. աշխատել է Հայաստանի պետական հեռուստատեսությունում որպես նկարիչ - ձևավորող՝ տաղավարների և հաղորդումների նկարազարդումներով: 1993 թ.-ից եղել է նույն հեռուստաընկերության գլխավոր նկարիչը, իսկ «Նորք» հեռուստաընկերության ստեղծումից հետո` տվյալ հեռուստաընկերության գլխավոր նկարիչը:

Նրա ձևավորմամբ են եթեր հեռարձակվել ուսումնական խմբագրության համարյա ողջ հաղորդաշարերը «Հայ ժողովրդի պատմություն», «Պատմության և մշակույթի հուշարձանները», «Մեր լեզուն մեր խոսքը», ֆրանսերեն, անգլերեն, ռուսերեն հեռուստադասերը, «Բարի գիշեր» իրիկնային հեքիաթի նկարազարդումները, երաժշտական, երիտասարդական, հասարակական, քաղաքական հաղորդումները։ Լրատվական «Լրաբեր», «Օր 7-րդ», երաժշտական «Հայ երգի ակումբ», հասարակական - քաղաքական «Հինգշաբթի», «Հայ տուն», «Գավիթ», ժամանցային «Սրճարան տանգո», «Խոշոր շահում», «Ոսկե զառ», «Համով լոտո», «Բարի լոտո» և այլ հաղորդաշարերը:

Նրա նկարազարդումներով են տպագրվել մի շարք գրական գործեր՝ «Նոթեր Շերլոկ Հոլմսի մասին» (Արթուր Կոնան Դոյլ), «Ծաղինկերս մնացին հեռվում» (Բոգդան Վերդյան), «Պատերազմի ծուխը» (Հովհաննես Մելքոնյան), «12 ճանապարհորդության դարերի խորքը» (Կարեն Մուսաելյան), «Կանաչ կամուրջ» (Սարգիս Խարազյան), ինչպես նաև «Նորշեն - Ծղալթբիլա» և «Իմ բնօրրան Խաշուտ» գրքերը:

Զբաղվում է գեղանկարչությամբ, գրաֆիկայով, կոլաժով, գրքերի նկարազարդումով:

2008թ. նկարել է Երևանի մարզահամերգային համալիրի սրահի ճակատային մասի «Հաղթական պար» 4000x100 սմ չափսով յուղաներկ պաննոն:

Վ. Հովհաննիսյանն ցուցահանդեսների սկսել է մասնակցել 1978թ.-ից: Ունեցել է անհատական ցուցահանդեսներ: Վերջինն 2019 թ. հունիսի 8-ից 17-ը Հայաստանի նկարիչների միությունում:

Վ. Հովհաննիսյանն 2004թ. դարձել է ՀՀ նկարիչների միության անդամ: